galicias>> instituto de estudios carballiñeses >> indice de artigos de ágora do orcellón
| INSTITUTO DE ESTUDIOS CARBALLIÑESES |
|||||||
Presentación
AVELINO MULEIRO GARCÍA, Director
Coincidindo
co primeiro aniversario da aprobación dos Estatutos e da asemblea constituínte
do Instituto de Estudios Carballiñeses, nace hoxe a revista Ágora
do Orcellón, órgano divulgativo de tódalas actividades
que se desenvolvan dentro do Instituto. Nela aparecerán reseñas
dos traballos de investigación que se realicen dentro dos diferentes
Departamentos, informarase das diversas actividades culturais que se programen
por parte do Instituto e facilitaranse tódalas noticias que se relacionen
coa Comarca do Carballiño, dentro ou fóra do seu ámbito
xeográfico, e que, de conformidade cos fins estatutarios do Instituto
de Estudios Carballíñeses, sexan valorados de máximo interese.
Pero o cerne da revista estará formado por artigos de investigación
que irán publicando periodicamente os distintos integrantes de cada Sección
ou Departamento do Instituto, deixando sempre a porta aberta a outras persoas
que, aínda sen seren membros desta Asociación, pero gozando de
recoñecido prestixio intelectual ou creto social, desexen utilizar esta
revista para expoñer as súas ideas e manifestar publicamente as
súas opinións.
Ágora do Orcellón pretende ser un
foro aberto a todos, tal como era a ágora da Grecia clásica onde
se debatían os problemas relacionados coa polis. Tamén aquí
se poderán expoñer e discutir asuntos relacionados coa comarca
do Orcellón, fermoso recuncho galego agargalado con luzadas de historia
e cultura popular, tendo no Carballiño o seu centro gravitatorio natural
desde onde toda noticia se modula, se amplifica e alanca en ás dunha
ben merecida fama que resoa por toda a xeografía galega.
Con esta vocación de apertura tolerante,
nace hoxe Ágora do Orcellón. Na súa filosofia non caben
os sectarismos intempestivos nin os dogmatismos apriorísticos. Tampouco
terán acubillo nela a falta de respecto ás persoas nin as desavinzas
ideolóxicas. Queremos empezar esta xeira coa aspiración de implicar
ó maior número posible de persoas, estando totalmente abertos
á colaboración plural e ós criterios diverxentes. Se o
tempo chega a premiar co éxito o noso traballo e a nosa ilusión,
queremos facer partícipes del a tódolos que adoitan afoutarnos
a cotío, sabedores de que non hai gozo verdadeiro se non é compartido.
Neste primeiro número incluimos as conferencias
que, co gallo da XXXIV FESTA DA MIMOSA, se ofreceron no Casino do Carballiño.
Agradecémoslles desde aquí ós seus autores, D. José
Mª. R. Iglesias Veiga, D. Gerardo Sacau Rodríguez e D. Bernardo
Miguel Vázquez Gil, a súa desinteresada e inestimable colaboración
co INSTITUTO DE ESTUDIOS CARBALLIÑESES.
De aquí adiante, cada vez que Ágora
esperte nos berces irtos do prelo para alancar un novo chanzo na superación
da súa propia réplica, abriremos, de par en par, as contra ventás
dunha ampla fiestra desde onde se poderá contemplar un abrente prometedor,
pintado quizáis maxicamente polos míticos cantos do cisne de Vilamorta,
símbolo pardobazano dun agora vivo Carballiño. O aire fresco que
entre por esa fiestra vai convocar nun espacio común as lembranzas dun
extraordinario pasado histórico cos azos dun pletórico presente
desde o que se catapultará un infindo potencial de futuro.
Quero apostar forte polo futuro de Ágora
do Orcellón, porque deste xeito disporemos doutra posibilidade máis
de nos reencontrar co noso pasado, peiteando, se cómpre, con suavidade,
anaco a anaco, toda a Comarca ata tela segmentada completamente para, logo,
darlle unidade sintética, estructural e cultural. Así, pois, voto
polo éxito desta publicación, desexándolle unha fructífera
e longa vida.
(Número 1. Novembro de 2000)
"O que converte a vida nunha bendición non é facer o que nos gusta, senón que nos guste o que facemos" (GOETHE)
©Instituto de Estudios Carballiñeses.
Contador