10ª ANDAINA DO XURÉS
Madrugón. Se nos mandaran non o faciamos. Cento e pico esforzados decidimos tomar en serio a xornada de reflexión previa ás eleccións europeas e fomos ata o Xurés, para pensar a fondo, e para meditar paseniñamente o noso voto... Empezou a andaina ás nove e un pequeno pico. Chovía. E logo seguiu chovendo. E choveu tanto que non quedou nada seco na roupa nin no corpo dos camiñantes...
E de moito andar e de pouco pensar... ó cabo dunhas horas rematamos os 17 km de subir e baixar costas (mais subir que baixar, todo hai que decilo)... rematámolos, digo, coas ideas non sei se claras, pero polo menos ben lavadas...
Logo baixamos en autobuses ata a base, onde había duchas con auga quente (nesto nótase que estamos en Europa), e logo un xantar que non era moi luxoso pero que serviu ben... A verdade é que a organización estivo moi ben, como acontece ano tras ano (e xa van dez, que por algo esta é a segunda das andainas da provincia de Ourense, soio superada pola de Allariz, que anda pola 12 edición)...
Café. Risas. Conversas. Fotos. E sorteo de premios. Por certo dous rillamillas (Luisa e Ignacio) estiveron entre os premiados...
E así foi... a nosa xornada de reflexión... Dura pero fermosa.
Eu sígome preguntando: ¿Por qué cando imos de andaina e chove moito a xente está máis contenta? Pode que este plus que pon a auga que botan do ceo con caldeiros nos axude a segregar ainda máis endorfinas...
Por certo, choveu e choveu tanto que a cámara cando rematou a andaina facía as fotos así.
"O que converte a vida nunha bendición non é facer o que nos gusta, senón que nos guste o que facemos" (GOETHE)
"No me resigno a que, cuando yo muera, siga el mundo como si yo no hubiera vivido" (Pedro Arrupe)
Engadir galicias.com a Favoritos
Benvid@, estás na túa casa